HALLO EN WELKOM!

Ek is Lizanne Kruger

Namibiër, plaasvrou, taalredigeerder, proefleser en ma (onder andere). En natuurlik, skrywer van my debuutroman, Omber.

HALLO EN WELKOM!

Ek is Lizanne Kruger

Namibiër, plaasvrou, taalredigeerder, proefleser en ma (onder andere). En natuurlik, skrywer van my debuutroman, Omber.

LIZANNE KRUGER

My storie

Gebore in die Kaap (1969). Met ‘n skoolhoof as pa, het ons redelik rondgetrek: Uit Southfield na Botrivier, Jonkersberg (ja, presies daar waar Dalene Matthee se beautiful stories afgespeel het), Kanoneiland (waar die helfte van my hart nog lê) en toe Windhoek (1980). Hier was ek in Pionierspark Laerskool en Academia Hoërskool. Na skool het ek B.Soc. Sc (MW) Hons. aan die UOVS studeer van 1988 -1991 en van daar pos my beurshouer my Omaruru toe – ‘n pragtige klein dorpie in Namibië. Hier was ek ‘n maatskaplike werker tot 1997 en het ook my man, Louis, hier ontmoet.

Ons boer net buite Omaruru. In 2004 word Luka gebore. Hy studeer tans in Potchefstroom. In 2009 word Keyo gebore en hy is tans ‘n leerling aan Privaatskool Moria in Outjo.

Sedert 2015 woon ek met die kinders in Otjiwarongo, waar hulle eers skoolgegaan het, en so pendel ons nou nog tussen skool en plaas.

Die skryfgogga het my bitter vroeg in my lewe al gebyt – wil my doodlag as ek nou na daardie pogings gaan kyk. Op universiteit het van my gedigte in studentepublikasies verskyn. Daarna het van my kortverhale in Huisgenoot, Rooi Rose en Taalgenoot verskyn.
My eerste manuskrip was ‘n totale ramp! Ek vermoed die uitgewers het ook so gedink. Maar opgee was nie ‘n opsie nie en ek het deurgedruk. Die volgende poging was Omber en daar ontdek ek toe Turksvy Publikasies en kyk waar trek ek nou!

Ek het jare gelede ‘n skryfkursus deur Martie Preller, grotendeels op kinderboeke gebaseer, gedoen. Meer onlangs het ek twee ander skryfkursusse deur SA Writing College gedoen met die skrywer Maya Fowler as my tutor. Ek het ook verlede jaar ‘n joernalistiekkursus deur hulle gedoen. Iets wat ek elke skrywer sal aanbeveel, is om ‘n proeflees-en-redigeerkursus te doen.
Ek het een deur Vryskutskrywer gedoen, asook ‘n blogkursus. Beide met Leonie Benghiat as tutor.

Behalwe stories uitdink, gee ek ekstra Afrikaans-klasse, asook nasorgklasse vir skoliere. Ek is ook ‘n gekwalifiseerde scribe en leser vir kinders wat eksamenhulp nodig het.

Omber is afgelei van die Franse woord ombré wat beteken om van een kleurskakering na ‘n volgende te beweeg. Omber beweeg van donker na lig.

Die storie gaan oor Rosa, Brit, Miranda en Juliette. Hulle is vanaf hul skooljare vriende, regte eighties girls en nou in hul vyftigs.

Hul skooldae spin hulle saam in een taai spinneweb. Hulle lewe gaan aan, maar die web trek hulle terug.

Was Miranda se e-pos werklik nodig? Moet dinge nie maar bly daar waar dit gelos is nie?

ONTMOET DIE OMBER-GIRLS

Rosa is ‘n dromer, vryskutjoernalis en haat die rykmansbuurt in Windhoek waar sy bly. Sy is getroud met Nell, narsis en blatante poephol. Sy doom van wegsweef.

Miranda is Swakopmund se cupcake queen en eienaar van Pandoras, ‘n eksentrieke koffiewinkel. Sy het ‘n fassinasie met die Brat Pack van die tagtigerjare en gesels gereeld met hulle. Sy stook haar zolle en is getroud met Japie-my-skapie, hoërskoolhoof. Die donker wil haar kort-kort kom haal.

Juliette, die gevalle atleet, dra nou kinders op die heup en klim gereeld haar huis se mure uit van wanhoop. Pruis dartel soos ‘n skoenlapper in sy eie huis rond en boer in sy gim – iets wat Juliette uit haar sisteem moet hardloop tussen Windhoek se koppies.

Britt, blonde bom van die Kaap, wend haar tot seksuele misterie en verdiep haar in haar tekstielfabriek. Sy leef net vir een man, maar sy pa steek ‘n stokkie daarvoor. Sy sit met ‘n geheim, maar weet sy gaan lelik op tone trap.